Астана Халықаралық университеті мен Қытай Ұлттық ядролық корпорациясы білікті мамандарды даярлауға арналған жаңа жобаны талқылады

Бүгін Астана Халықаралық университетінің Президенті Серік Ирсалиев Қытай Ұлттық ядролық корпорациясының (CNNC Overseas) бас өкілі Ли Юйдун мырзамен стратегиялық кездесу өткізді. Келіссөздің басты мақсаты – жоғары білікті инженерлерді, IT-мамандар мен энергетиктерді даярлау.

Астана Халықаралық университетінің Президенті Серік Ирсалиев сауда-экономикалық байланыстардың ұлғаюы мен инвестициялық жобалардың көбеюі, сондай-ақ Қазақстанда қытайлық АЭС-тің алдағы құрылысы қытай тілін меңгерген жоғары білікті мамандарға деген сұранысты арттыратынын атап өтті. Сонымен қатар, Қытай өнеркәсібі мен технологияларының ауқымды дамуы Қытайдың заңнамасы мен технологиялық стандарттарын түсінетін инженерлерге деген сұранысты тудыратынын жеткізді.

Қазіргі уақытта Астана Халықаралық университетінде Қытай тілі бойынша мамандар даярлау ісі белсенді түрде жүзеге асуда. Университет жанында Бейжің Тіл және Мәдениет Университетінің бөлімі жұмыс істейді. Мұнда студенттер қытай тілі бойынша базалық білім алады. Нәтижесінде, Қытайдың жетекші университеттерімен достық қарым-қатынас нығайып, энергетика, құрылыс, медицина, жасанды интеллект және ауыл шаруашылығы салаларында мамандар даярлау үшін қос дипломды бағдарламалар әзірленуде. Осы тұрғыда Астана Халықаралық университетінің Президенті Серік Ирсалиев Қытай Ұлттық ядролық корпорациясының бас өкілі Ли Юйдун мырзаға ғылыми-білім беру саласындағы ынтымақтастықты одан әрі дамытуды ұсынды.

Астана Халықаралық университеті Эндаумент-қоры Қамқоршылық кеңесінің төрағасы Фархад Қуанғанов бірлескен бағдарламаларды орнықты қаржыландыру механизмі ретінде университет капиталының мүмкіндіктерін таныстырды. Қор дарынды ғалымдарды даярлауға және жаңа білім беру инфрақұрылымын салуға, оның ішінде Қытай Ұлттық ядролық корпорациясы тәрізді ірі серіктестер ұсынған корпоративтік стипендиялық бағдарламаларды қолдауға бағытталған.

Қытай Ұлттық ядролық корпорациясының бас өкілі Астана Халықаралық университетінің әлеуетін жоғары бағалап, білікті мамандарды даярлау және атом саласында бірлескен ғылыми бағдарламаларды жүзеге асыру бойынша ынтымақтастықты нығайтуға дайын екенін жеткізді. Корпорация алдағы уақытта кадрлар даярлау мәселесіне баса назар аударып, білім беру және ғылыми мақсаттарға бөлінетін қаражат көлемін анағұрлым арттырмақ.