Жаңалықтар

📢 Халықаралық жобаларға қатысып, ЕҚЫҰ сарапшыларының дәрістерін тыңдап, халықаралық құқық пен қауіпсіздік саласындағы біліміңізді жетілдіргіңіз келе ме? Енді сізде осындай мүмкіндік бар!

Astana International University-де ЕҚЫҰ бағдарламалар офисінің басшысы Dr. Volker Frobarth және кеңсе ассистенті Mira Mussabekova университет басшылығымен кездесті. Кездесуде қауіпсіздік, адам құқықтарын қорғау, академиялық алмасу және ғылыми зерттеулер мәселелері талқыланды. Басты қорытынды – қазіргі заманғы сын-қатерлер университеттер мен халықаралық ұйымдардың күш біріктіруін талап етеді.

📌 Кездесу нәтижесінде AIU мен ЕҚЫҰ арасындағы ынтымақтастық туралы хаттамаға қол қойылды. Бұл студенттерге жаңа мүмкіндіктер ашады:

✅ Халықаралық құқық, қауіпсіздік және адам құқықтары бойынша білім беру және зерттеу жобаларына қатысу.
✅ Халықаралық сарапшылардың дәрістері мен тренингтері.
✅ Ғылыми зерттеулер үшін ЕҚЫҰ-ның аналитикалық материалдарына қол жеткізу.
✅ Конференциялар, дөңгелек үстелдер және ЕҚЫҰ моделін іске асыру.

🎯 Әсіресе, 6B04202 – «Халықаралық құқық» білім беру бағдарламасының студенттері үшін үлкен мүмкіндіктер ашылады. Олар тек теорияны меңгеріп қана қоймай, алған білімдерін нақты жобаларда қолдана алады.

🌍 Бұл – кәсіби дамуға және халықаралық дипломатияға терең бойлауға тамаша мүмкіндік. Алдағы іс-шараларды жіберіп алмау үшін жаңалықтарды қадағалаңыз! 🚀

6 наурызда Astana International University-де «Екі жұлдыз» байқауы өтті

«Екі жұлдыз» – жай ғана байқау емес, бұл аналарға, әжелерге және барша әйелдер қауымына деген құрмет пен махаббаттың көрінісі. Байқауға студент пен оқытушыдан құралған дуэттер қатысты. Оның негізгі мақсаты – таланттарды таныту мен қолдау, сондай-ақ студенттер мен профессорлық-оқытушылық құрам арасындағы мәдени қарым-қатынасты нығайту.

Байқаудың алғашқы кезеңінде қатысушылар нәзік жандыларға деген алғыс пен құрметке толы әндерді орындады.

Екінші кезеңде дуэттер танымал қазақстандық хиттерді орындап, өнерлерін нағыз мини-шоуға айналдырды. Бұл кезеңде олардың вокалдық шеберлігімен қатар, әртістік қабілеттері де байқалды. Барлық нөмірлер тек қана жанды дауыста орындалып, көрермендерге ерекше әсер сыйлады.

Қазылар алқасы мүшелері – Astana International University вице-президенті Абдрахманов Қайрат Амангелдіұлы, «Saryarqa» телеарнасының журналисі және жүргізушісі Назерке Алтынбек, «Хабар» арнасындағы «Оян» бағдарламасының жүргізушісі, актриса Ғалия Медиева, сондай-ақ AIU-дің халықаралық ынтымақтастық жөніндегі менеджері Аманов Әділ Серікұлы болды.

Қазылар үшін жеңімпаздарды анықтау оңай болған жоқ – қатысушылардың дайындығы жоғары деңгейде өтті. Байқау қорытындысы бойынша бірінші орынды Педагогикалық институт, екінші орынды Жоғары экономика мектебі, үшінші орынды Ақпараттық технологиялар және инженерия жоғары мектебі иеленді. Жеңімпаздарға 100 мың, 75 мың және 50 мың теңге көлемінде ақшалай сыйлықтар табысталды. Қалған қатысушыларға естелік сертификаттар беріліп, көрермендер оларды ыстық ықыласпен қолдады.

«Екі жұлдыз» байқауы музыка, талант және шынайы эмоциялар мерекесіне айналды. Ол қоғамдағы әйел рөлінің маңыздылығын еске салып, көрермендерге ерекше әсер сыйлады.

Жаратылыстану ғылымдары Жоғары Мектебінің оқытушылары - Жас Ғалым байқауының жеңімпаздары!!

Қарабалаева Айман Бейсембайқызы мен Әбілова Шолпан Бейсембайқызы Қазақстан Республикасы Ғылым және жоғары білім министрлігі қаржыландыратын "Жас ғалым" жобасы аясында жас ғалымдардың зерттеулерін гранттық қаржыландырудың жеңімпаздары атанғанын қуана хабарлаймыз. Олардың жұмыстары өзекті экологиялық және білім беру міндеттерін шешуге бағытталған.

1-жоба: Қазақстан мектептерінің оқушылары арасында экологиялық сауаттылықты дамыту үшін интерактивті экоплатформалар мен цифрлық білім беру ресурстарын құру, ғылыми жетекші: А. Б. Қарабалаева. Зерттеу заманауи білім беру әдістемелерін енгізуге және экологиялық мәдениетті дамытуға ықпал ететін оқушылардың экологиялық санасын қалыптастыру үшін цифрлық құралдарды әзірлеуге бағытталған.. 2-жоба: "Көкшетау" мемлекеттік ұлттық табиғи паркінің аумағындағы орманды-дала аймағының қылқан жапырақты ағаш түрлерін дендрохронологиялық зерттеу;, ғылыми жетекшісі: Ш. Б. Әбілова. Зерттеу қоршаған ортаны бақылауда және орман экожүйелерін климаттың өзгеруіне бейімдеу стратегияларын әзірлеуде маңызды рөл атқаратын климаттық өзгерістерді және орман алқаптарының экожүйелік тұрақтылығын талдауға бағытталған. Жеңімпаздарды құттықтаймыз және ғылыми жобалардың сәтті жүзеге асырылуын тілейміз!

2025 жылғы 5 наурызда университетке Венгрияның Қазақстандағы Елшісі Отто Иван Рона келді. Сапар барысында ол университет басшылығымен және студенттермен кездесіп, Stipendium Hungaricum бағдарламасы — Венгрияның жетекші жоғары оқу орындарында білім алуға мүмкіндік беретін қазақстандық студенттерге арналған стипендиялық бастама туралы әңгімеледі.

Stipendium Hungaricum бағдарламасы әртүрлі елдерден, соның ішінде Қазақстаннан келген студенттерге Венгрияның жетекші жоғары оқу орындарында оқуға мүмкіндік беретін стипендиялық бастама болып табылады. Бағдарламаның гранттары оқу ақысын, тұру шығындарын жабады, сонымен қатар медициналық сақтандыруды қамтиды. Бағдарлама бакалавриат, магистратура және PhD бағдарламаларын қамтиды, бұл Еуропада сапалы білім алғысы келетін студенттер үшін кең перспективалар ашады.

Елші Венгрия мен Қазақстан арасындағы білім беру байланыстарының маңыздылығын атап өтіп, Stipendium Hungaricum-ға қатысу екіжақты қатынастарды нығайтуға көмектесетінін атап өтті. Сондай-ақ, Рона мырза білім, экономика және мәдениетті қоса алғанда, түрлі салаларда Қазақстанмен ынтымақтастықты дамытуға баса назар аудара отырып, Венгрияның сыртқы саясаты туралы айтып берді.

Студенттер өтінім беру процесі, оқу шарттары және Венгриядағы өмір туралы сұрақтар қою арқылы бағдарламаға үлкен қызығушылық танытты. Бұған жауап ретінде Елші бағдарламаға қатысқысы келетіндер үшін пайдалы ақпарат бере отырып, толық түсініктеме берді..

Astana International University Отто Иван Рон мырзаға сапары үшін алғыс білдіреді және білім беру саласында Венгриямен ынтымақтастықты одан әрі дамытуға үміттенеді. Қосымша ақпарат алу үшін студенттер университеттің халықаралық ынтымақтастық департаментіне жүгіне алады.

Astana International University 3 наурыз – 5 сәуір 2025 жыл аралығында AIU BUSINESS INNOVATION атты 5-ші инкубациялық бағдарламасының басталғанын жариялайды. Бағдарлама Жоғары экономика мектебінің базасында өтеді.

Бұл бағдарлама стартап негізін қалаушыларға, кәсіпкерлерге және бизнес саласындағы білімдерін жетілдіргісі келетін студенттерге арналған. Қатысушылар:
✅ бизнес стратегиялары мен тәуекелдерді басқару әдістерін,
✅ тиімді шешімдер іздеу тәсілдерін,
✅ бизнес-идеяларды генерациялау және тестілеу әдістерін,
✅ нарықтық сұранысты талдауды,
✅ MVP құру және бизнес-модель әзірлеуді,
✅ алғашқы инвесторларды тарту жолдарын меңгереді.

🔹 Бағдарламаның маңызды кезеңі – Demo Day. Қатысушылар өз жобаларын сарапшылар алқасының алдында таныстырып, инвесторлар мен кәсіпкерлерден кері байланыс алады. Сонымен қатар, «НАРИ QazInnovations» АҚ-ның 20 млн теңгеге дейінгі гранттық қаржыландыру байқауына қатысуға мүмкіндік беретін сертификатқа ие болады.

🔹 Бағдарламаның негізгі спикері – Кремний алқабының сарапшысы, сериялық кәсіпкер, Vibranium венчурлық қорының негізін қалаушы Замир Шухо. Ол AIU Президенті Ирсалиев С.А.-ның шақыруымен қатысып, құнды тәжірибесімен бөліседі.

🔹 Қонақ спикерлер: Ольга Чернова (қаржылық модель құру бойынша маман) және Даурен Базилов (бизнесте AI қолдану бойынша сарапшы).

🔥 Қатысушыларға сәттілік тілейміз және жобаларын табысты қорғауға сенеміз!

28 ақпанда Л.Н. Гумилев атындағы Еуразия ұлттық университетінде Халықаралық студенттік шет тілдер олимпиадасы өтті. Бұл ауқымды зияткерлік сайысқа 3 елдің 15 университетінен 100-ден астам талантты студент қатысты.

AIU Педагогикалық институтының 1-курс студенті, УХТиИЗО-24А тобының мүшесі Хайруллина Айсәуле Ашимқызы құрметті 3-орынды жеңіп алды! Ол жоғары білім деңгейі мен шет тілдерін жетік меңгергенін дәлелдеп, университетіміздің абыройын асқақтатты.

Олимпиада онлайн форматта өтті, бұл қатысушылардың географиясын кеңейтіп, түрлі елдің студенттеріне өз қабілеттерін көрсетуге мүмкіндік берді.

Айсәулені лайықты жеңісімен құттықтаймыз! Оның еңбекқорлығы мен білімге деген құштарлығы үшін алғысымызды білдіреміз. Сондай-ақ, оны дайындауға қолдау көрсеткен Педагогикалық институттың аға оқытушысы Конкал М.-ға ерекше алғыс айтамыз.

Айсәулеге жаңа жетістіктер, оқуында табыс және жарқын кәсіби болашақ тілейміз!

📎Astana International University халықаралық байланыстарын кеңейтуді жалғастыруда. Осы бағытта AIU басшылығы Newton University (Чехия) өкілдерімен кездесу өткізіп, серіктестікті нығайту және студенттерге жаңа білім беру мүмкіндіктерін қарастырды.

📍Кездесу барысында тараптар қос диплом бағдарламаларын, академиялық алмасуларды және ғылыми зерттеулер саласындағы ынтымақтастықты дамыту перспективаларын талқылады. Newton University ағылшын және чех тілдеріндегі білім беру бағдарламаларын ұсынды, оның ішінде "Global Business Management" бакалавриаты және "Academy and Sustainable Management" магистратурасы бар.

🖊️Кездесуде шетел тілдерін оқыту және арнайы тіл орталықтарын құру мәселелеріне ерекше көңіл бөлінді. AIU студенттерін Newton University білім беру бағдарламаларына, күндізгі және қашықтықтан оқыту форматына интеграциялау мүмкіндіктері қарастырылды.

📚Newton University өкілдері университеттің виза рәсімдеуге, құжаттарды аккредитациялауға және студенттердің бейімделуіне қолдау көрсететінін атап өтті. ЖОО халықаралық компаниялармен белсенді ынтымақтаса отырып, студенттерге тәжірибеден өту және практикалық дағдыларды меңгеру мүмкіндігін ұсынады. Сонымен қатар, Newton University гранттар мен стипендиялар жүйесін дамытып, студенттерге Оксфорд университеті секілді жетекші ЖОО-ларда жазғы мектептерде оқу мүмкіндігін қарастырады.

📆Бұл – тек бастамасы! Мамыр айында Newton University басшылығы AIU-ға келіп, бірлескен жобалардың егжей-тегжейін талқылайды. Бұл бастамалар AIU студенттерінің білім көкжиегін кеңейтіп қана қоймай, қазақстандық білім берудің әлемдік академиялық кеңістікке интеграциялануына ықпал етеді.

Astana International University алға ұмтылуын жалғастырып, студенттерге жаңа халықаралық мүмкіндіктер ашуда! 🌍✨

2025 жылдың 25 ақпанында Астана Халықаралық Университетінде студенттердің шақырылған мамандармен кездесуі өтті. Іс-шара барысында екі маңызды тақырып қарастырылды:

🔹 «Стресті басқару, буллинг» – бұл тақырып бойынша психолог сөз сөйлеп, стрессті басқару жолдары, буллингтің алдын алу әдістері және психологиялық тұрақтылықтың маңыздылығы туралы айтты.

🔹 «Обырсыз өмір» – бұл тақырып аясында салауатты өмір салты дәрігері мен әлеуметтік қызметкер баяндама жасады. Мамандар онкологиялық аурулардың алдын алу, салауатты өмір салтын ұстану және тұрақты медициналық тексерулердің маңызы туралы пайдалы ақпаратпен бөлісті.

Студенттер белсенді түрде пікірталастарға қатысып, сұрақтар қойып, психологиялық және физикалық денсаулықты сақтау бойынша ұсыныстар алды. Мұндай кездесулер тек білімді кеңейтумен шектелмей, өзін-өзі және айналадағы адамдарды күту мәдениетін қалыптастыруға көмектеседі.

2025 жылдың 21 ақпанында тұрақты даму мақсаттарын іске асыру аясында, Жаратылыстану ғылымдары жоғары мектебінің аға оқытушысы Маханова Наргиза Асқарқызы 1-курс «Биология» мамандығы студенттері арасында «Жас биологтар алаңы» атты танымдық сайыс өткізді. Бұл шара студенттердің биология пәніне деген қызығушылығын арттырып, шығармашылық ойлау мен логикалық тұрғыда шешім қабылдай білу дағдыларын дамытуға бағытталған маңызды қадам болды. Студенттер өздерінің ғылыми білімдерін көрсетуге, бір-бірімен тәжірибе алмасуға мүмкіндік алды.Сайыс нәтижесі бойынша: 1- орын: StemQaz тобы 2- орын: EcoBoost тобы 3- орын: BioFenix тобы

2025 жылғы 25 ақпанда Astana International University Болгарияның жетекші жоғары оқу орны – Әулие Климент Охридский атындағы София университетінің өкілдерін қабылдады!

Делегация құрамында профессор Гергана Петкова, доцент Йованна Тодорова және Әл-Фараби орталығының директоры Виолетта Добичина болды. Кездесу барысында AIU басшылығымен бірлескен ғылыми зерттеулер, академиялық мобильдік және студенттермен алмасу бағдарламалары, сондай-ақ мәдени және білім беру бастамаларын дамыту мәселелері талқыланды. AIU-дың білім беру үдерісіне белсенді түрде енгізіп жатқан инновациялық технологиялары мен цифрлық шешімдері ерекше қызығушылық тудырды.

🚀 Маңызды жаңалық!
AIU мен София университеті «Экологиялық менеджмент» қос дипломды бағдарламасын іске қосады! Бұл – студенттерге халықаралық деңгейде білім алып, екі университеттің дипломын қатар алу мүмкіндігін беретін бірегей жоба.

AIU халықаралық ынтымақтастық аясын кеңейтуді жалғастырып, студенттер мен оқытушылар үшін жаңа мүмкіндіктер ашуда. Бұл сапар бірлескен жобалар мен ғылыми жаңалықтарға бастайтын тағы бір маңызды қадам болды.

#AIU #AstanaInternationalUniversity #СофияУниверситеті #ХалықаралықЫнтымақтастық #ҚосДипломдыБағдарлама #ЭкологиялықМенеджмент #Білім #Инновациялар

Бүгін Astana International University қабырғасында көптен күткен «Ғылыми зерттеулердегі деректердің маңызы: талдау және қолдану ерекшеліктері» атты республикалық ғылыми семинар өз жұмысын бастады. Бұл маңызды шара тарихшыларды, археологтарды, ғалымдарды және ғылыми зерттеулер мен тарихи мұраға қызығушылық танытқан студенттерді біріктірді.

Семинар тарихи деректерді талдау саласындағы бірегей білім мен практикалық тәжірибе алмасуға арналған ашық алаңға айналды. AIU студенттері сарапшылардың пікірлерін тікелей тыңдап, сұрақтар қойып, өзекті мәселелерді талқылауға мүмкіндік алды.

Семинардың алғашқы күні мазмұнды әрі әсерлі өтті:

• Дархан Қыдырәлі, ҚР Парламенті Сенатының депутаты, профессор, тарих ғылымдарының докторы тарихи деректерді талдау және жүйелеу әдістері туралы баяндама жасап, олардың ұлттық құндылықтарды түсінудегі маңыздылығын атап өтті.

• Әлімақын Дүйсенәлі, журналист, «Болашақ» бағдарламасының стипендиаты АҚШ архивтерінен табылған Қазақстанға қатысты материалдар туралы баяндама жасады. Бұл деректер студенттердің үлкен қызығушылығын тудырып, олардың халықаралық тарихи дереккөздер мен Қазақстанның әлемдік тарихи контексте алатын орны туралы түсініктерін кеңейтті.

• Сонымен қатар, Жанболат Қазанбаев, «Бозоқ» музейінің тарихи-мәдени мұраны қорғау бөлімінің жетекшісі Бозоқ қаласының тарихы мен оның археологиялық зерттеулердегі маңызы жайлы өз зерттеулерімен бөлісті.

AIU студенттері семинар барысында белсенділік танытып, спикерлерге сұрақтар қойып, өз ойларымен бөлісті.

Семинар 2025 жылдың 28 ақпанына дейін жалғасады, алда әлі талай қызықты баяндамалар, пікірталастар мен жаңа ғылыми жаңалықтар күтіп тұр.

18 ақпанда «Көркем білім беру» ІР және «Көркем еңбек және бейнелеу өнері мұғалімі» білім беру бағдарламаларының студенттері ART мастер-класс ұйымдастырды. Іс-шараның басты мақсаты – студенттердің шығармашылық қабілеттерін дамыту және көркем өнер саласындағы заманауи трендтермен таныстыру.

Мастер-классқа қатысушылар әртүрлі сурет салу әдістерін меңгеріп, бояу түстерін үйлестіру, композиция құру және көркемдік дағдыларын жетілдіру бойынша тәжірибелік жұмыстар жасады. Болашақ мұғалімдер келген студенттерге бағыт-бағдар беріп, өз тәжірибелерімен бөлісті.

Қатысушылар бұл іс-шараның шығармашылық шабыт сыйлағанын және болашақ кәсіби дамуы үшін жаңа мүмкіндіктер ашқанын атап өтті. ART мастер-класс студенттердің өз қабілеттерін сынап көруіне және өнерге деген сүйіспеншілігін арттыруға мүмкіндік берді.

Білім беру бағдарламасының жетекшісі Келімбетова А.Ғ. студенттердің белсенділігін жоғары бағалап, мұндай шаралар болашақ педагогтардың кәсіби дамуына оң әсер ететінін атап өтті.